Адпачынак для душы. Канцэрт у гонар святой Цэцыліі
У суботу, 19 лістапада 2011 г., у каталіцкім салезіянскім цэнтры моладзі пры касцёле ў Смаргоні адбылася незвычайная імпрэза. Канцэрт у гонар святой Цэцыліі, апякункі касцёльнай музыкі і спеваў, тут быў арганізаваны ўпершыню.
І тым не менш паўдзельнічаць у ім знайшлося шмат жадючых. Гэта былі людзі розных узростаў: і зусім маленькія артысты, і моладзь, і людзі сталага веку. Прадстаўлялі сольныя нумары і выступалі калектывамі, прычым не толькі католікі. Тут можна было пачуць як касцёльныя песні, так класічныя і сучасныя творы.
Цудоўнымі нумарамі парадавалі парафіяльны хор «Auxilium», які неўзабаве адзначыць сваё 20-годдзе, дзіцячы хор, моладзевы гурт з нашага араторыя. Самыя смелыя ўдзельнікі катэхезы таксама прадэманстравалі свае музычныя здольнасці — дзеткі спявалі, танцавалі і ігралі на музычных інструментах. Упрыгожылі свята калектывы са смаргонскай школы мастацтваў: аркестр народных інструментаў, ансамбль класічных інструментаў «Subito», струнны ансамбль «Кантрасты».
У новым амплуа прадсталі і святары парафіі — кс. Здзіслаў Вэдэр SDB, кс. Аляксандр Яшэўскі SDB, кс. Іван Огар SDB. Разам з клерыкам Алегам і салезіянскім прэнавіцыем Юрыем Пашкаўцом яны выканалі песню на італьянскай мове ў гонар Найсвяцейшай Панны Марыі.
Мерапрыемства стала цудоўным адпачынкам для душы. Слухачы атрымалі зарад пазітыўнай энергіі, а ўсе ўдзельнікі — бурныя апладысменты і ганаровыя граматы з рук смаргонскіх святароў. Граматамі таксама былі адзначаны арганісты касцёла Чэслаў Жых, Юрый Спірыдовіч, Здзіслаў Ялгоўскі, касцёльны хор «Auxilium» і асабіста яго кіраўнік Іна Жых, а таксама настаўніца Алена Конан за актыўную дапамогу ў музычным упрыгожванні парафіяльных мерапрыемстваў.
